අත්අඩංගුවේ සිටිය දී මියගිය තරුණයාගේ මරණය සම්බන්ධයෙන් සැකය පොලිසියට...!

අත්අඩංගුවේ සිටිය දී මියගිය තරුණයාගේ මරණය සම්බන්ධයෙන් සැකය පොලිසියට...!

පොලිස් අත්අඩංගුවේ සිටියදී මියගිය සත්සර නිමේශ් නමැති තරුණයාගේ මරණය සැක සහිත බව සිරකරු අයිතිවාසිකම් ආරක්ෂා කිරීමේ සංවිධානයේ සාමාජිකයෙකු වන නීතීඥ සේනක පෙරේරා මහතා පවසයි. 

වැලිකඩ පොලිසිය විසින් සත්සර නිමේශ් නමැති මෙම තරුණයා අත්අඩංගුවට ගනු ලබන්නේ අප්‍රේල් මාසයේ පළමු වැනි දා ය. ඒ, කිසියම් පිරිසක් විසින් කරන ලද පැමිණිල්ලකට අනුවයි. පොලිසිය පවසන ආකාරයට, මෙම තරුණයාගේ “සැකසහිත හැසිරීමක්” නිරීක්ෂණය කළ කිසියම් පිරිසක්, පොලිස් හදිසි ඇමත-ුම් අංශය අමතා අදාල තරුණයා පොලිසියට භාර දී තිබේ. 

පොලිස් භාරයට පත් තරුණයා විමර්ශන සදහා සහයෝගය නොදී උමතු ලෙස හැසිරුණු බවත්, ඒ හේතුව මත එදිනම රාත්‍රියේ මෙම තරුණයා මුල්ලේරියාව මානසික රෝහලට ගෙන ආ බවත් පොලිසිය කියයි. 

රෝහලට ගෙන එන විටත් මෙම තරුණයා මියගොස් සිට ඇති බවට සැකයක් මේ වන විට නිර්මාණය වී තිබේ. 

ඊට හේතුව, අදාල තරුණයාගේ මවගේ ප්‍රකාශයකි. 

එම ප්‍රකාශයට අනුව, රෝහලට ගෙන එන විටත් තම පුතා මියගොස් සිටි බව රෝහලේ වෛද්‍යවරයෙකු මෙම මවට පවසා තිබේ.

ඒ අනුව, මෙම තරුණයාගේ මරණය සම්බන්ධයෙන් ස්වාධීන විමර්ශනයක් සිදු කරන ලෙස නීතීඥ සේනක පෙරේරා මහතා වැඩ බලන පොලිස්පතිගෙන් ඉල්ලා සිටියි.