"පාස්කු ප්‍රහාරය පිටුපස සුරේශ් සලෙයි සිටියා ද..?"සාක්ෂි ලබා දීමට අසාද් මවුලානා නුදුරේදීම දිවයිනට..?

"පාස්කු ප්‍රහාරය පිටුපස සුරේශ් සලෙයි සිටියා ද..?"සාක්ෂි ලබා දීමට අසාද් මවුලානා නුදුරේදීම දිවයිනට..?

පාස්කු ඉරිදා ත්‍රස්ත ප්‍රහාරය පිළිබදව මේ දක්වා වාර්තාවන බිහිසුණුම අනාවරණය සිදු කර තිබෙන්නේ අසාද් මවුලානා නමැති අයයි. 

අසාද් මවුලානා පිල්ලෙයාන්ගේ මාධ්‍ය ප්‍රකාශක ලෙස කටයුතු කර තිබුණි. එමෙන්ම ඔහු, පාස්කු ඉරිදා ත්‍රස්ත ප්‍රහාරය එල්ල කළ සහරාන් කණ්ඩායම සහ හමුදා බුද්ධි අංශ අතර සම්බන්ධතා ගොඩ නැගීමට මැදිහත් වූ අතරමැදියෙකු ලෙස ද කටයුතු- කර තිබෙන බව ඔහු විසින්ම හෙළි කර තිබේ. 

අසාද් මවුලානා කරලියට ආවේ, චැනල් ෆෝ නාලිකාව, පාස්කු ඉරිදා ත්‍රස්ත ප්‍රහාරය සම්බන්ධයෙන් සිදු කළ වාර්තා වැඩ සටහනකිනි. 

එම වාර්තා වැඩ සටහන හමුවේ පෙනී සිටින අසාද් මවුලානා, ප්‍රහාරය සිද්ධ වන විට හමුදා බුද්ධි අංශ ප්‍රධානියාව සිටි සුරේශ් සලෙයි සහ සහරාන් කණ්ඩායම අතර සම්බන්ධය හෙළි කර සිටි අතර, ඉන් නොනැවතී, පාස්කු ප්‍රහාරය, ගෝඨාභය රාජපක්ෂ බලයට ගෙන ඒම සදහා සුරේශ් සලෙයි ඇතුළු කණ්ඩායමක් විසින් දියත් කරන ලද කුමන්ත්‍රණයක් බව ප්‍රකාශවන ආකාරයේ කරුණු රැසක් ද අනාවරණය කළේ ය. 

අසාද් මවුලාලා මේ සියළු අනාවරණයන් සිදුකර තිබෙන්නේ ඔහු දේශපාලන රැකවරණ පතා ගොස් සිටින ස්විට්සර්ලන්තයේ සිටයි. 

නව රජයට බලයට පත් විමෙන් පසු, පාස්කු ප්‍රහාරය පිළිබද විමර්ශන නව අදියරකට පැමිණ තිබෙන අතර, ඔහු දන්නා තොරතුරු මෙරටට පැමිණ ලබා දෙන ලෙස අසාද් මවුලානාගෙන් ඉල්ලා ඇති බව වාර්තා වේ. 

ඒ අනුව, අසාද් මවුලානා නුදුරු දිනයක දී ලංකාවට පැමිණීමට නියමිත බව පැවසේ. 

දේශපාලන රැකවරණ පතා ලංකාවෙන් පිටතට ගොස් සිටින පුද්ගලයෙකු එසේ සිටින අතරතුර නැවත ලංකාවට පැමිණියහොත් ඔහුට අදාල රටේ දේශපාලන රැකවරණය යළි නොලැබෙන බව වාර්තා වේ. ඒ අවධානම තබාගෙනම අසාද් මවුලානා දිවයිනට පැමිණීමට සූදානමින් සිටින බව ස්විට්සර්ලන්තයේ සිට වාර්තාකරණයේ යෙදෙන ප්‍රකට යූ ටියුබ් මාධ්‍යවේදියකු-වන ශ්‍රී ලාල් පවසයි. 

අසාද් මවුලානා ස්විට්සර්ලන්තයේ සිට කෙලින්ම ලංකාවට නොපැමිණෙන අතර, ඔහු මුලින්ම ප්‍රංශයටත් ඉන් පසුව ලංකාවටත් පැමිණීමට නියමිත බවයි පැවසෙන්නේ.