බාල බෙහෙත් වංචාව; "කෙහෙළිය ඇතුළු පිරිස දැඩි මානසික පීඩනයක..! සියදිවි නසා ගැනීමට වුවත් ඉඩ තිබේ..!"නීතීඥ මණ්ඩලය අධිකරණයට දැනුම් දෙයි.

බාල බෙහෙත් වංචාව; "කෙහෙළිය ඇතුළු පිරිස දැඩි මානසික පීඩනයක..! සියදිවි නසා ගැනීමට වුවත් ඉඩ තිබේ..!"නීතීඥ මණ්ඩලය අධිකරණයට දැනුම් දෙයි.  

ප්‍රමිතියෙන් තොර බාල ඖෂධ ගෙන්වීම සම්බන්ධයෙන් අත්අඩංගුවට ගෙන දීර්ඝ කාලයක් රක්ෂිත බන්ධනාගාරගත කර සිටින කෙහෙළිය රඹුක්වැල්ල ඇතුළු ප්‍රධාන සැකකරුවන් කිහිප දෙනා, දරුණු මානසික පීඩනයකට ලක්ව ඇති බවත්, ඔවුන් සියදිවි නසා ගැනීමේ අවධානමක් ඇති බවත්, එම සැකකරුවන් වෙනුවෙන් පෙනී සිටින නීතීඥ මණ්ඩලය ඊයේ මාළිගාකන්ද මහේස්ත්‍රාත් අධිකරණය හමුවේ ප්‍රකාශ කර තිබේ. 

ඒ අනුව, එම සැකකරුවන්, විශේෂඥ මනෝ වෛද්‍යවරයෙකු වෙත ඉදිරිපත් කිරීම සදහා අවසර ලබා දෙන ලෙසද ඔවුන් ඉල්ලා තිබේ. 

මෙම ඉල්ලීම මෝසමක් මගින් ඉදිරිපත් කරන ලෙස මහේස්ත්‍රාත්වරිය නීතීඥ මණ්ඩලයට දැනුම් දී ඇති බව වාර්තා වේ.

බාල ඖෂධ ගෙන්වූ බව කියන අයුසුලේට් බයොටෙක් ෆර්මා සමාගමේ හිමිකරු වන සුගත් ජානක ප්‍රනාන්දු, වෛද්‍ය සැපයුම් අංශයේ හිටපු අධ්‍යක්ෂ වෛද්‍ය කපිල වික්‍රමනායක, වෛද්‍ය සැපයුම් අංශයේ සහකාර අධ්‍යක්ෂ ශාන්තිනී සොලමන්, ගණකාධිකාරී (සැපයුම්) නෙරාන් ධනංජය, සෞඛ්‍ය අමාත්‍යාංශයේ හිටපු ලේකම් ජනක චන්ද්‍රගුප්ත, වෛද්‍ය සැපයුම් ඒකකයේ නියෝජ්‍ය අධ්‍යක්ෂ ජනරාල් වෛද්‍ය හේරත් මුදියන්සේලාගේ ධර්මසිරි රත්නකුමාර හේරත්, හිටපු සෞඛ්‍ය අමාත්‍ය කෙහෙළිය රඹුක්වැල්ල, සෞඛ්‍ය අමාත්‍යාංශයේ හිටපු අතිරේක ලේකම් සමන් රත්නායක, වෛද්‍ය සැපයුම් අංශයේ නියෝජ්‍ය අධ්‍යක්ෂ වෛද්‍ය අරඹේගෙදර තුසිත සුදර්ශන, ඖෂධ නියාමන අධිකාරියේ හිටපු ප්‍රධාන විධායක නිලධාරී විජිත් රණසිංහ ගුණසේකර යන අය මෙම නඩුවේ සැකකරුවෝ වෙති.